LAOAG CITY – Mamati ni Gob. Matthew Marcos Manotoc nga agpaut pay iti dua a bulan sakbay a naan-anay a makumpleto ti baro a Ferdinand Edralin Marcos Memorial Stadium.
Segun kenkuana, naginad ti pannakaipan ti rubber track gapu ta napabutngan ti gobierno probinsial iti napasamak iti kallabes nga administrasyon nga alisto a nagdadael ti rubber track.
Inlawlawagna a nainpanawenan ti panangisayangkat ti grupona ti inspeksion itay napalabas a lawas gapu ta naduktalanda nga adda ti sangkabassit a kurang ti kapuskol ti maikabkabil iti 1st layer ti track banag a nakorehir a dagus.
Imbatadna nga ar-aramiden ti gobierno probinsial ti amin a kabaelanna tapno masigurado a masurot a naimbag dagiti umiso a rukod dagiti nadumaduma a pasilidad pakairamanan ti rubber track.
Malaksid iti daytoy, kuna ti gobernador a nupay addan iti siyam a pulo ket uppat a porsiento ti naileppas iti stadium ket masapul a matarimaan ti “football field” kalpasan nga adda ti nadadael bayat ti Tan-ok ni Ilocano Festival.
Innayonna nga awan pay ti naituding nga aldaw a pannakakumpleto ti stadium agsipud ta adda manen ti naiyetnag nga “extension.”
