LAOAG CITY – Dakkel ti papel ti Armed Forces of the Philippines (AFP) iti baro a singin a linteg ti Philippine Maritime Zone ken Philippine Archipelagic Sea Lanes Law a pinirmaan ni Pres. Ferdinand Marcos Jr. idi Biernes, Nobiembre 8, 2024.
Segun ken ni Armed Forces of the Philippines Chief of Staff Gen. Romeo Brawner, babaen iti nasao a linteg, nabilin ti Sandatahang Lakas ng Pilipinas kangrunaanna ti Philippine Navy a protektaran ken depensaan ti maritime zones ti pagilian nangruna kadagiti external aggression.
Inbatadna a nabilin met ti Philippine Coast Guard (PCG) nga ipatungpal ti linteg nangruna kadagiti aglablabsing ken saan a dumaldalan iti naikeddeng a sea lanes.
Kuna ni Brawner, siguradoen ti Philippine Navy a natalged ti maritime zones ti pagilian.
Inpasigurado ti Phil. Coast Guard a natalged ti kabaybayan para kadagiti mangngalap nga agbirbirok para iti panagbiagda.
Iti nasao a baro a singin a linteg ket maliklikan dagiti parikot wenno panangdinnungpar dagiti barko.
Inlawlawag ni Brawner a maragsakanda iti panagpirma iti baro a singin a linteg gapu ta agbalin a nalawag ti hurisdiksion ti Pilipinas iti teritorio daytoy.
Saan met a masinunuo ti Armed Forces of the Philippines nga agsardengen ti China iti panang-harass kadagiti lugan pangbaybay ti Pilipinas.
Nupay kasta, inpetteng ni Brawner a ti napateg ket addan ti linteg ti pagilian maipanggep iti daytoy.
