LAOAG CITY – Maysa a panagadal ti mangibagbaga a ti moringa oleifera nga am-ammo kas “miracle tree,” ket mabalin a makatulong iti panagikkat ti microplastics iti mainum a danum.
Basar iti panagsukisok nga inwayat dagiti sientipiko manipud iti Brazil’s Institute of Science and Technology of São Paulo State University, ti extract manipud iti bukel ti moringa ket nakaikkat ti agingga iti 98% ti microplastics iti danum manipud iti gripo.
Nagusar dagiti agsuksukisok ti saline extract manipud iti bukel ti moringa ken pinadasda ti kontaminado a danum.
Agop-operar daytoy babaen ti coagulation no sadinno a patpatayen ti negative charge ti microplastics isut gapuna a mabukbukel daytoy ken al-alisto a ma-filter.
Segun iti panagadal, ti resulta ket kapada ti epekto dagiti chemical coagulants kas ti aluminum sulfate ngem ti moringa ket natural, biodegradable ken saan a toxic.
Ti moringa ket masansan nga agtubtubo iti tropical regions ken nabayagen nga us-usaren kas taraon, agas ken simple a water purifier gapu iti natural proteins-na a kumapkapet iti impurities.
