LAOAG CITY – Naimula ti agarup 400 a marunggay iti Forest Park iti Barangay Cabungaan-A ditoy siudad ti Laoag kagiddan ti Marunggay Festival ita nga aldaw, Hunio 20 kas paset iti pannakaselebrar ti maika-61 a tawen a Charter Day ditoy siudad.
Segun ken ni Engr. Shiela Opelac, mangidadaulo ti City Agriculture Office, nasuratan dagiti amin a barangay ditoy siudad nga agmulada ti marunggay no sadinno a nagutigot dagiti adda iti urban barangays nga agmula ti saan a nababbaba ngem 10 a marunggay idinto a dagiti adda iti rural barangays ket agmula dagitoy ti saan a nababbaba ngem 30 a marunggay.
Inbatadna a maysa daytoy kadagiti ma-monitor iti panangtingitingda iti Hapag kay PBBM Implementers in Barangay a masapul a makita a nagbiag dagiti inmulada a marunggay.
Inlawlawagna a napateg ti panagmula ti marunggay a maaw-awagan kas miracle plant a mabalin a makaala ti vitamin A, vitamin C, iron ken protein.
Mainaig iti daytoy, inpakaammo ni Mrs. Mylene Pascual, mangidadaulo ti City Environment and Natural Resources Office a dakkel ti papel ti marunggay iti environmental protection and management ken iti greening and biodiversity enhancement.
Kuna met ni Barangay Kagawad Ronald Juan a dakkel a pakabenepisiaran dagiti residente ti panagmula ti marunggay maipapan iti salun-at dagitoy.
Kabayatanna, inpaganetget ni Mayor James Bryan Alcid a ti marunggay ket saan laeng a gagangay a mula a makita iti aglawlaw no diket maibilang daytoy nga ecological savior ken nutritional powerhouse.
