LAOAG CITY – Nagun-od ti lokal a gobierno ti siudad ti Laoag ti Outstanding City Local Government Unit iti national category.
Ti nadakamat a pammigbig ket naisayangkat iti 51st Gawad saka parangal para sa mga natatanging magsasaka at mangingisda no sadinno ket daytoy ti kangatoan a recognition award body ti Department of Agriculture para iti nagduduma a categories.
Segun ken ni Engr. Shiela Opelac, mangidadaulo ti City Agriculture Office iti siudad ti Laoag, malaksid ti panakaibigbig ti lokal a gobierno kas outstanding Local Government Unit category ket nagbalin pay a national finalist da Mr. Joefrey A. Pascual, top 3 kas outstanding corn farmer ken ni Opelac, top 2 kas outstanding agricultural extension manager iti pagilian.
Malaksid iti pannakaibigbigda iti national ket manamnama pay a mapadayawan ti lokal a gobierno ti siudad ti Laoag iti regional level kas outstanding corn cluster ti Laoag City SouthWest corn cluster association, outstanding cassava cluster association ti Talingaan cassava cluster association ken ti outstanding Fisheries and Agriculture resources management council ti Laoag City Seafarmsea nga idadauloan ni Mr. Ruben Marino no sadinno ket maysa pay isuna a National nominee ken Regional winner.
Gapo iti daytoy, nakaiyawid ti lokal a gobierno ti siudad ti Laoag ti aggatad P2 million project manipud iti national winning-da ket manamnama pay ti kanayunanna manipud iti regional awards a naikeddeng inton sumaruno a bulan.
Kabayatanna, impasigurado ni Engr. Opelac a dagiti nagun-odda a pondo manipud kadagiti pammadayaw a nakaibigbigan ti lokal a gobierno ket mausar para iti nasaysayaat a delivery system ken digitalization ti sektor ti agrikultura iti siudad.
