LAOAG CITY – Naituding nga agtestigo ni dati nga Overseas Filipino Worker Mary Jane Veloso intono Hunyo 19 iti uneg ti Correctional Institution for Women iti ciudad ti Mandaluyong.
Isayangkat daytoy ti Mandaluyong City Regional Trial Court Branch 210 no sadinno a denggen ti testimonya ni Veloso iti uneg ti Correctional Institution for Women a nakaibaludan na.
Maipalagip nga idi pay 2024 a naiyakar ni Veloso iti Correctional Institution for Women manipod Indonesia kalpasan a nasentensyaan gapu iti drug trafficking.
Agtestigo ni Veloso kontra kadagiti iligal recruiter a ni Maria Cristina Sergi ken dadduma pay iti kaso a qualified trafficking in person, estafa ken panaglabsing ti Migrants Workers and Overseas Filipino Act.
Maisaysayangkat ti panagdengngeg iti kaso iti Santo Domingo, Nueva Ecija Regional Trial Court ken gapu ta nagkabalud ni Veloso iti Correctional Institution for Women ket nagdesisyon ti Korte Suprema nga isayangkat ti panagdengngeg iti uneg a mismo ti prison compound.
Binilin met ti korte ti Correctional Institution for Women a mangisagana ti kuwarto a pakaisayangkatan ti panagdengngeg nga atendaran ti sumagmamano a personnel ti Mandaluyong Regional Trial Court ken dadduma a partido.
