LAOAG CITY – Masapol a mangted ti serbisyo ken maaddaan ti kapadasan ditoy pagilian dagiti nurses sakbay nga agturong dagitoy iti abroad.
Daytoy ti inbatad ni Dr. Alan Taylan, agtagikua ti maysa a pribado nga ospital ditoy siudad kalpasan nga adda ti rakurak ni presidente Ferdinand Marcos Jr. a maipangato ti deployment cap ti nasao a propesyon iti abroad.
Inbatad na a karaman ditoy ti pannakapadur-as ti technical skills ken dadduma nga advanced technology nga isu ti maus-usar iti sabali a pagilian.
Mainaig iti daytoy, kuna ni Taylan a karit para kadagiti ospital a pribado wenno pampbliko ti posible a panagkurang ti nalalaing a nurse nu dagitoy ket mapan amin agtrabaho iti ballasiw taaw.
Inlawlawag na a dakkel a makatulong iti pagdur-asan ti maysa a nurse ti panagtrabaho iti abroad ngem saan a maliklikan a ti health care system ti pagilian ti marigatan nu bilang bumassit dagiti healthcare providers.
