LAOAG CITY – Innagananen ti Palestinian militant group nga Hamas ti baro a lider da kalpasan a pimmusay ti predecessor na a ni Ismail Haniyeh iti maipagarop nga inpatungpal nga strike ti Israel iti Iran.
Daytoy ket ni Yahya Sinwar, ti top official ti Hamas iti Gaza a mastermind wenno akin-utek ti October 7 attacks iti Israel a nakatayan ti nasurok a 1,200 a tattao ken hinostage da ti 250 a sabsabali pay.
Ni Sinwar ket maysa pay a secretive figure a nasinged iti Iran a nangikarigatan iti sumagmamano a tawen tapno mapapigsa ti militar ti Hamas.
Ti pannakapili ni Sinwar ket maysa a senyales a nakasagana ti Hamas iti agtultuloy a pannakilaban da iti Israel kalpasan ti assassination ken ni Hamas leader Haniyeh.
Mabalin a wagas pay daytoy ti Hamas tapno probokaren ti Israel.
Segun met ken ni Hamas spokesman Osama Hamdan, itultuloy ni Sinwar dagiti negosasyon mainaig iti ceasefire.
Nupay kasta, agtalinaed ti Hamas a natibker iti politika pakairamanan ti battlefield.
Kabayatanna, inrakurak ni Israeli military spokesman Rear Admiral Daniel Hagari nga adda ti maymaysa a lugar para ken ni Yahya Sinwar ken daytoy ket iti abay ti napapatay a ni Hamas military wing leader Mohammed Deif ken ti nabatbati a terorista nga adda iti likudan ti October 7 attack.
