LAOAG CITY – Personal nga ininspeksiyon ni Mayor James Bryan Alcid ken dagiti sumagmamano a kameng ti konseho, pakairamanan dagiti Department Heads ti sitwasyon ti Bonifacio Street, Rizal Street ken sumagmamano pay a paset ti sentro ti siudad no rabii.
Segun iti mayor, adda dagiti nakapsot ken naperdi a silaw a nasken a masukatan wenno matarimaan a dagus.
Kuna na a nasken a masukatan dagitoy ti napigpigsa a silaw kas ti LED lights ken manayonan tapno ad-adda a nalawag dagiti kangrunaan a kalsada ditoy ciudad ti Laoag.
Inpasingked na pay a maiplastar amin a silaw kadagiti kalsada ditoy siudad para iti nataltalged a komunidad ken seguridad dagiti umili ken motorista.
Maipalagip nga immunan nga indasar ni Konsehal Jayson Perera ti nagbalin nga obserbasyon na nga adda dagiti silaw kadagiti kalsada ditoy ciudad nga alas-dies paylaeng ti rabii ket naiiddepen.
Patien ti konsehal a saan a rumbeng a kastoy ti mapasamak gapo ta arigna napukaw ti responsibilidad dagiti street lights nga ipaayan ti lawag dagiti residente iti agpatnag.
