LAOAG CITY – Inbatad ni Mayor Edmar Vincent Bonoan iti ili ti San Nicolas a nasurpresa kalpasan a naamoan na nga adda ti 352-milyon a pisos ti nasao nga ili.
Gapu iti daytoy, kuna na a dinamag na a dagus iti Accounting Office ti municipyo no mano ti pondo ti lokal a gobierno iti ili ti San Nicolas ita a tawen.
Naamoan na a 290-milyon a pisos laeng ti pondo ti municipyo ita a tawen ken ti nadakamat a 352-milyon a pisos ket saan nga isu amin ket general funds.
Segun iti mayor, karaman iti 352-milyon a pisos ket ti Trust Funds, Special Education Funds ken dadduma pay.
Maipalagip a nagbalin nga isyu ti kaha ti gobierno lokal iti ili ti San Nicolas gapu ta maipagarop nga adda ti nabati a pondo ti ili sakbay a sinublat ti administrasyon ni dati a Mayor Mike Hernando nga isu ti maipagarop a naigatang ti lote a pakaiyakaran ti munisipyo.
