LAOAG CITY – Mamati ni Mayor Ferdinand Dancel Aguindaldo iti Pasuquin, Ilocos Norte a 101 a porsiento a politika ti makagapu iti pannakairaman ti nagan na iti narco-list nga inparuk-at ni Presidente Rodrigo Duterte.
Gapu ti daytoy, kiniddaw ti mayor nga iyalisto koma dagiti maseknan nga otoridad iti mangiyuswat iti nalawag a validation.
Innayon na a 90 a porsiento kadagiti kailian na ket ammo da ti mapaspasamak iti ili da ken dagiti maibatbato nga alegasyon kontra kenkuana.
Kumpiyansa ti mayor nga ad-adda pay nga ipateg isuna dagiti kailian na gapu kadagiti maibakbakal kenkuana nga alegasyon.
Iti agdama, kuna ti mayor nga ad-adalen dan ti sumaruno nga addang da mainaig iti pannakairaman na iti narco-list.
Inpakaammo ti mayor a naka-leave agingga intono domingo, Marso 17 tapno maselebraran da ti anibersayo da ti asawa na idiay Metro Manila.
Nupay kasta, inpasingked ni Aguinaldo nga apaman nga agsubli iti ili da intono Lunes ket kasarita nanto dagiti kailian na tapno ilawlawag na ti pannakairaman ti nagan na iti narco-list.
