LAOAG CITY – Inkalintegan ni SAGIP Party-list Rep. Paolo Marcoleta ti ilunglungalong a “virtual voting” iti Senado nga insingasing ti amana a ni Senador Rodante Marcoleta ken sinuportaran ti Majority Bloc.
Basar iti nai-post a video iti social media, inpetteng ni Congressman Marcoleta nga iti Kamara de Representantes ket nabayagen a maipatpatungpal ti online participation ken voting dagiti kongresista isu a saan a nasken a kwestionaren no aramiden met daytoy ti Senado.
Inladawan ni Rep. Marcoleta a no adda ti gakat nga ipasa ti Kamara de Representantes ket maipalpalubos nga agbutos dagiti kongresista iti babaen ti electronic platforms no awan dagitoy iti Batasan Complex.
Inlawlawagna nga uray awan iti plenario ti Kamara de Representantes ket mabalin a mairekord ti butos ti maysa a kongresista iti babaen ti text messages, group chats wenno panangawag iti Secretary General.
Innayonna a mabalin a makipaset kadagiti panagdengngeg dagiti komite iti Kamara de Representantes dagiti kongresista basta alaen ti virtual link tapno makipartisipar iti diskusion.
