LAOAG CITY – Nakaawat ni Mayor James Bryan Alcid ti surat mainaig ti kalikagum a pannakaipangato ti plete manipud kadagiti gunglo ti traysikelan ditoy siudad.
Ti surat ket manipud ken ni Mr. Alwin Martin, Presidente ti Federated Tricycle Association of Laoag nga agkiddaw da ti lima a pisos a pannakaipangato ti plete.
Basar iti nakaipalaon ti surat, daytoy ket gapu iti agtultuloy a pangngato ti presio ti produkto a petrolyo no sadinno a ti kanayonan a plt ket dakkel a tulong para kadagiti pamiliada.
Segun met ken ni Vice Mayor Rey Carlos Fariñas a ti surat ket naka-hold pay laeng gapu ta adda ti naipaay a financial assistance kadagiti nasao a drayber.
Nupay kasta, kunana nga addanto ti panangiwayatda ti public hearing tapno ad-adda a mangngegan dagiti sentimo ti nasao a gunglo.
Iti agdama, ti plete ket umabot iti 20 a pisos para iti regular passenger idinto a 15 a pisos iti Person with disability (PWD), Estudiante ken Senior Citizen.
