LAOAG CITY – Mamati ni Mayor Joseph De Lara iti ili ti Solsona nga adda ti maris pulitikana ti pammerperdi kenkuana babaen iti panagusar ti dummy account nga addaan ti nagan nga Akron Hammer.
Segun kenkuana, patienna nga adda ti pakainaiganna iti pulitika ti agdama a mapaspasamak iti grupoda kalpasan nga adda ti dummy account a mangperperdi iti imaheda iti publiko.
Gapu iti daytoy, nagikkat ni Sangguniang Bayan Member Marvin Pascua iti grupoda kalpasan nga isu ti rumrummuar a maitudtudo nga adda iti likudan ti nadakamat a dummy account.
Inbatadna a saanna a pilpiliten ti indibidual a saanna kayat a makikadua iti grupoda nangruna no isu ti mangitunda ti pannakadadael iti grupoda.
Inlawlawagna a no asinoman ti adda iti likudan ti dummy account a mangperperdi kenkuana ken iti grupoda ket sabali iti panagkitada wenno awan ti napintas a makitada kadakuada.
Mainaig iti daytoy, mamati ni Mayor De Lara a saan laeng a maymaysa nga indibidual ti adda iti likudan ti nasao a dummy account no di ket ad-adu pay ngem maysa.
Innayonna nga iti agdama ket manarimaan ti naiget a pannakaisayangkat ti imbestigasion babaen iti Cybercrime Division tapno maduktalan dagiti agus-usar iti dummy account.
Immuna iti daytoy, nagikkat ni Konsehal Pascua iti Team De Lara ken mas pinilina ti agbalin nga independent gapu iti maipagarup a maipabpabsol kenkuana nga isuna ti adda iti likudan ti dummy account.
