LAOAG CITY – Dismayado ni Mayor Michael Marcos Keon ditoy ciudad ti Laoag kadagiti mapaspasamak ken dumandanon kenkuana a nagduduma nga isyu kalpasan ti eleksyon.
Karaman ditoyen ti pannaka-hack dagiti facebook accounts na, ti panagkalikagom na a mangipila ti kaso kontra iti maysa a radio station, ti saan a pannakaaprubar ti AIP ken ti kaudian ket ti maipagarop a pannakakomprontar dagiti sumagmamano a kapitan.
Segun kenni Keon, ti grupo ni Barangay Felisa Felipe iti Barangay 27; kapitan Beverly Juan iti Barangay Lagu-Sail, Kapitan Jericho Dela Rosa iti Brgy. 21; Kapitan Lauro dela Cruz iti Brgy. 12; kapitan Julius Bareng iti Brgy 22 ken Kapitan Franklin dela Cruz iti Brgy 29 ket nagturong iti opisina na tapno kablaawan daytoy.
Nupay kasta, bayat ti panagsasarita dagitoy ket nadakamat ti grupo dagiti kapitan a maipagarop a kinumprontar isuda ni Junjun Dancel banag a nakakigtotan na.
Inpalgak na a maipagarop nga inbaga ni Dancel nga iti Barangay Election, amin dagiti nadakamat a kapitan ket addan to ti kalaban da babaen kadagiti coordinators ti Team Lazo kadagiti nasao a barangay.
Malaksid iti daytoy, rumrumuar pay a dagiti coordinator ti agpili no siasinno ti agbalin a benipisyaryo ti AICS.
Inpetteng na a mapaspasamak daytoy kadagiti kapitan gapo ta dagitoy ket rumrumuar a pro-MMK.
Nupay kasta, inlawlawag ni Keon a dagiti nadakamat a kapitan ket saan a pro-MMK no diket neutral da laeng.
Mainaig iti daytoy, inpasigurado ni Mayor Keon a kabaelan na amin a sangwen dagitoy a karit kenkuana babaen iti panagtitinnulong da iti grupo na.
