LAOAG CITY – Kinumpirmaran ni Atty. Joel Ginez, election supervisor ditoy probinsya a nagpila ti election protest iti korte ni outgoing Mayor Marlon Sales iti ili ti Pagudpud.
Nupay kasta, saan na nga ammo ti naan-anay a detalye mainaig iti daytoy gapo ta naibaga laeng ti election officer iti nasao nga ili ti addang ti nasao a mayor.
Segun kenni Ginez, awan ti naawat ti opisina na ken awan ti bileg da a mangiyuswat ti imbestigasyon wenno agdesisyon kadagiti maipila nga election protest.
Inbatad na a daytoy laeng ti naipadanon kenkuana nga election protest a naipila.
Kabayatanna, inlawlawag ni Ginez a no pudno ti report nga agkedked a bumaba iti pwesto ni Sales ket mabalin a mapwersar daytoy.
Kabayatanna, inlawlawag ni Sales no apay a nangpila ti election protest iti kontra iti resulta ti May 13 midterm elections.
Segun kenni Sales, bassit laeng ti 66 a butos a nakaatiwan na kenni Incoming Mayor Rafael Benemerito ken adda ti nakita da a maipagarop nga adda ti saan a nabilang a 407 a butos iti kina-mayor.
Inbatad na a saan na nga ammo no pabor kenkuana wenno iti kinalaban na dagiti maipagarop a saan a nabilang gapo ta saan a binasa ti VCMs dagitoy.
Kunana a naamoan ti kampo na a saan a nabilang dagiti butos kalpasan a nakita da ti resulta iti kada presinto a dinawat da iti comelec office iti nasao nga ili.
Gagem ti panangipila na ti election protest a mabilang a mano-mano dagiti maipagarop a butos.
Naamoan a nagcounter protest ti kinalaban na a kampo rason nga amin a presinto ket ma-recount ken iyur-uray da pay laeng ti desisyon ti korte.
Kabayatanna, naglikudan ni Sales a saan na a kayat ti bumaba iti pwesto gapo ta nakasaganan ti transition team a mangiturn-over amin a kasapulan iti baro nga agtugaw nga administrasyon.
