LAOAG CITY – Nakapagsapatan ni Mayor Michael Marcos Keon ditoy ciudad ti Laoag babaen kenni Gov. Matthew Marcos Manotoc.
Sakbay ti panangpasapat ni Manotoc kenni Keon ket adda pay laeng ti one-on-one a saritaan dagitoy.
Ti nasao nga oath-taking ceremony ket inatendar dagiti nagduduma nga opisyal ditoy ciudad ti Laoag ken iti Sang. Panlalawigan, ken dagiti department heads ken dadduma pay.
Segun kenni Mayor Keon, adda ti rason no apay nga ita nga aldaw ken iti oras a 8:40 iti bigat ti panagsapata na ngem saan nan nga indetalye pay daytoy.
Inbatad na pay a naragsak isuna iti panagsapata na nangruna ket ni Gov. Manotoc ti nangpasapata kenkuana kangrunaan na ket silulukat ti gobernador para iti reconciliation.
Mainaig iti daytoy, dinakamat ni Keon a patyen na a ti political dynasty ket paseten iti pulitika ti Pilipinas ken ti napateg ket ti panagserbi iti publiko.
Kabayatanna, sakbay kenni Keon, nagsapata met ni Konsehal Conrado Respicio babaen kenni Judge Nida Alejandro.
