LAOAG CITY – Awan ti plano ni Mayor Remigio Medrano iti ili ti Sarrat nga irekomendar iti IATF ti pannakaipan ti lockdown ti intero nga ili.
Segun kenni Medrano, saan pay laeng a masapol nga ilockdown iti intero a Sarrat gapo ta awan met pay ti nadeterminar a baro a source ti virus.
Daytoy key iti laksid nga umad-ado ti kaso ti covid-19 iti nasao nga ili no sadinno a dagiti baro a nagpositibo ket close contact dagiti ummuna a positive iti virus.
Inlawlawag na a ti panagado ti kaso iti virus ket gapo iti maisaysayangkat nga expanded testing wenno random testing iti 10 a porsyento manipud iti populasyon dagiti apektado a lugar.
Kabayatanna, dagiti nakalockdown a paset ti Sarrat ket ti intero a Barangay 7 San Manuel; Barangay 8 San Antonio; ken Barangay 9 San Lorenzo; Sitio Tabunay ken sentro ti Barangay 10, San Miguel; Sitio 1, 2, 3 iti Barangay 11 Sta. Rosa; intero a Barangay 12 San Bernabe; Sitio 1 iti Barangay 13 San Pedro; Purok Guidday ken Sitio 4 iti Barangay 16 Sto. Santiago, Sitio 6 ken 7 iti Barangay 17 San Felipe; kasta pay ti Sitio 5 ken 6 iti Barangay 18 San Isidro.
