LAOAG CITY – Naarestar a dagus dagiti otoridad ti maysa a lalaki a suspek iti napasamak a pammaltog iti Barangay 7, Sta. Cruz Sur iti ili ti Badoc.
Basar iti Philippine National Police iti ili ti Badoc, ti suspek ket agtawen ti 51, naasawaan, driver ken residente metlaeng iti nadakamat a barangay idinto a ti biktima ket agtawen ti 38, awanan ti asawa, mannalon ken residente met iti Barangay Caraitan iti nasao nga ili.
Iti imbestigasyon dagiti otoridad, kabayatan a magmagna nga agpapaamyanan ti biktima iti Brgy. 7, Sta. Cruz iti ili ti Badoc ket bigla lattan a pinaputukan iti sumagmamano a daras ti suspek.
Nupay kasta, nagasat ti biktima gapu ta saan a natamaan ken nakataray a napan nagkiddaw ti tulong ken ni Barangay Chairman Judy Bautista iti Barangay Caraitan iti ili ti Badoc.
Iti panagresponde dagiti otoridad iti nakapasamakan ti insidente ket nakarekobre da ti tallo (3) nga empty cartridge cases ti 9mm caliber.
