LAOAG CITY – Inrakurak ni Senator Erwin Tulfo nga ilunglungalong ti minority bloc ti naig-iget a panagimbestigar iti napasamak a pammaltog iti uneg a mismo ti pasdek ti senado.
Kalikagom ni Tulfo a maamoan saan laeng a ti sibubukel a napasamak no di ket karaman ti maipagarop a kinakurang iti transparency ken dagiti institusyon.
Segun ken ni Tulfo, kasapulan a maimbestigar a naimbag ti insidente tapno malawlawagan no ania ti pudno a napasamak aglalo ket agduduma ti bersyon ti napasamak manipod iti nagduduma a partido.
Innayon na a maipagarop nga ibagbaga ti mayorya a saan a daytoy nga stage wenno naar-aramid laeng, idinto nga adda met dagiti mangipetpetteng a planado daytoy ken uray ti National Bureau of Investigation (NBI) ket ipetpetteng da a saan da a rimmaot isut gapu na a kasapulan a mailawlawag a nasayaat gapu ta iyur-uray ti publiko ti kinapudno.
Kuna na a maysa pay a kayatna a saludsuden ket ti maipagarop a panagkedked ti Senado nga awaten ti suspensyon ken ni Senate Sergeant-at-Arms Mao Aplasca ken ti subpoena para iti CCTV footage ti insidente manipod iti Office of the Ombudsman.
Inpalgak na a nakababain a no adda ti subpoena ken imbestigasyon ket saan a makikooperar ti senado, a rumbeng a sumurot iti linteg.
Inpaganetget ni Tulfo a rumbeng nga ipaay ti CCTV footage tapno naan-anay a magna ti imbestigasyon.
Kwinestyunaran pay ti senador ti maipagarop a warning shot nga umabot ti 27 a putok, ken no apay a dagiti ebidensya ket paspasig nga adda iti biang ti Senado ken awan iti sabali a partido.
Dinakamat pay ni Tulfo a masapol a napalubusan ti media a nag-cover iti insidente tapno nalawlawag ti pasamak.
Kamaudianan na, nagtalinaed ti takder ti senador nga ado pay dagiti saludsud a kasapulan a masungbatan ken masapol a maituloy ti parallel investigation ti Department of Interior and Local Government ken dadduma pay nga ahensya.
