LAOAG CITY – Nagtataripnong dagiti mannalon iti ili ti Vintar kadwa da dagiti kameng ti National Irrigation Administration ken ni Mayor Richard Degala.
Karaman pay iti naiyuswat a taripnong dagiti department heads iti lokal a gobierno iti ili ti Vintar ken dagiti opisyal iti Barangay Salsalamagui, Barangay 10 ken Barangay 17.
Napagsasaritaan dagiti maseknan ti pannakaipasdek ti dam iti Sitio Bucana iti Bislak River.
Kuna ni Mayor Degala a nailawlawag kadagiti maseknan dagiti implikasyon ti pannakaipasdek ti dam iti nadakamat a lugar, kangrunaan na ti agbalin nga epekto na iti panawen ti tudtudo.
Ginundawayan met dagiti mannalon nga indanun ti pakaseknan da mainaig iti pannakapasayaat koma a naimbag dagiti kanal tapno masigurado a maiwaras a naimbag ti danom kadagiti kataltalunan.
Inpasigurado ni Mayor Degala a tutukan da a naimbag dagiti indasar a problema dagiti mannalon iti ili ti Vintar.
