LAOAG CITY – Nagyaman ni Mayor Richard Degala iti ili ti Vintar kalpasan a maysa ti ili da a naipaayan ti ambulansya manipod iti Philippine Charity Sweepstakes Office (PCSO).
Maipalagip a kabayatan ti selebrasyon ti maika-107 a kasangay ni dati a Presidente Ferdinand Marcos Sr. ket inyawat ni Presidente Ferdinand Marcos Jr. ti 69 nga ambulansya kadagiti nagduduma a probinsya iti rehiyon Uno no sadinno a 12 ti naipaay ditoy Ilocos Norte.
Karaman kadagiti naipaayan ti baro nga ambulansya ket iti ili ti Paoay, Carasi, Vintar, Pinili, Dumalneg, Sarrat, Badoc, Nueva Era, Pasuquin, Solsona, iti siudad ti Batac ken ditoy siudad ti Laoag.
Inbatad ni Degala a nabayagen a nagkiddaw da ti ambulansya iti Philippine Charity Sweepstakes Office ngem ita laeng a inpaay ti nasao nga opisina.
Gapu iti daytoy, kuna ni Degala nga addan ti uppat nga ambulansya ti lokal a gobierno iti ili ti Vintar a dakkel a makatulong kadagiti residente kangrunaan na no panawen ti emergency ken adda ti kalamidad.
Inpakaammo ti mayor a no malpas ti Satellite Office ti Disaster Risk Reduction and Management Office iti Barangay Dagupan iti Upper Surong Valley ket isunto ti pangikabilan da ti baro nga ambulansya da tapno a-alisto ti panagresponde na no kasapulan.
