LAOAG CITY – Aksidente a napaltugan ti maysa a kameng ti Philippine National Police iti ciudad ti Batac ti maysa a babai kabayatan ti panangdalos na ti paltogna iti protect box iti nasao a ciudad.
Daytoy ti kinumpirmaran ni Police Lt. Col. Jerome Wangkey, ti chief of police iti ciudad ti Batac.
Inbatad na a basar iti imbestigasyon da, naggapo iti checkpoint ti pulis nga addaan ti ranggo a patrolman, idi napanunot na a dalusan ti paltogna gapu ta mapan aginspeksyon ti Provincial Internal Affairs Service (PIAS) iti kabigatan na.
Kuna na a ti palawag ti nasao a pulis, kabayatan ti panangdalos na iti igamna ket nakalbit na ti trigger ti paltog, no sadinno a simmaplot iti plywood ti bala a nakadamgiyasan ti saka ti agtawen ti 41 a babai ken administrative Aide iti Mariano Marcos State University iti ciudad it Batac.
Inpakaammo ni Wangkey a dagus met nga intaray dagiti otoridad ti biktima iti ospital para iti pannakataming na.
Inpetteng ni Wangkey nga adda ti sursuruten da a pagannurutan iti panagdalos ti paltog no sadinno a masapol a siguradwen nga awan ti bala daytoy sakbay a dalusan da tapno maliklikan ti aniaman nga insidente, a daytoy ti nalipatan ti maseknan a pulis.
Inpasigurado ni Wangkey nga imbestigaren da a naimbag ti napasamak ken iti agdama ket nakaikabil iti restrictive custody ti nasao a pulis iti police station idinto a ti paltogna ket adda iti crime lab para iti ballistic examination.
Innayon na nga iyur-uray da ti agbalin a desisyon ti biktima no kasoan da ti pulis wenno saan.
Iti baet daytoy, kuna ni Wangkey a no bilang saanen nga interesado ti biktima a mangipila ti rekamo kontra iti pulis ket isayangkat da latta ti naun-uneg nga imbestigasyon ken nakadepende ti agbalin a resulta na no rebbeng a pilaan da daytoy ti kaso a Less Grave Neglect of Duty.
