LAOAG CITY – Natay ti maysa a balasitang kalpasan a nakuryente iti Barangay 8, San Nicolas, Ilocos Norte.
Nabigbig daytoy a ni Crista Jessica Mamuad, agtawen ti 17, estudyante ken residente iti met laeng nadakamat a baranggay.
Iti ekslusibo nga interview ti Bombo Radyo Laoag iti kabsat ti biktima a ni Mr. Allan Mamuad, aglaba kuma iti likud ti balay da ti biktima ngem idi isaksakna ti washing machine iti naperdi a receptacle ket ditoyen a nakuryente.
Segun ken ni Allan, mismo a dagiti kakasinsin da ti nakakita a nakadasay ti kabsat na ken inpagarop da a nagcollapsed, ngem idi asitgan da daytoy ket nakita da nga ig-iggaman na pay laeng ti waya ti extension.
Kinumpirmaran pay ni Allan a pimmutok ti dakulap ti kabsat na a nakaiggem iti naperdi a receptacle ken adda payen ti dara ti isbona.
Kuna na nga idi intaray da iti ospital ket naideklara a natayen ngem kiniddaw da latta nga ipadas dagiti doctor nga irevive ket naaddaan manen ti heart beat.
Nupay kasta, itay oras ti alas-dos ti parbangon ket pimmusay met laeng ti nasao a biktima.
Kinumpirmaran met ti kasinsin ti biktima a ni Mariel Menor a
saka-saka ni Jessica ken nabasa ti datar a nakadasayan na.
