LAOAG CITY – Kinumpirmaran ni Police Lt. Col. Jayson Batuyong, ti chief of police iti ciudad ti Batac ti panagpakamatay ti maysa a balasitang a residente iti Barangay Tabug iti nasao a ciudad.
Inbatad na a basar iti imbestigasyon ket nakita laengen ti ina ti biktima a nakabitin ti anakna iti poon ti acasia, 200 a metro ti kaadayo na manipod iti balay da.
Iti pannakaeksamen ti bangkay ti biktima ket kinumpirmaran ti attending physician a ni Dra. Celeste Abundo a pimmusay ti biktima gapu iti asphyxia secondary to strangulation.
Kuna ni Batuyong a nadakamat ti ina ti balasitang a dua a lawasen nga ang-angalen ti bikima ti panagsaksakit ti ulo na isut gapu na a saan unay a mapan sumsumrek iti pagadalan.
Innayon na nga iti panangimbestigar da iti cellphone ti biktima ket ditoy a nabasa da ti panagpakpakada na kadagiti papagayam ken kaklase na.
