LAOAG CITY – Nauram ti sumagmamano a paset ti maysa a balay a pagnanaedan ti tallo a pamilya iti Barangay 1 ditoy ciudad ti Laoag.
Segun iti maysa nga agkasera a ni Miss Nhestie Domantay, kasangsangpet na idi makangngeg ti arigna adda ti mangtimtimpag iti gate da ken inpagarop na nga adda dagiti agririri rason a saanna nga inkaso.
Nupay kasta, adda ti nangngeg na a mangipukpukkaw a maur-uram ti pagnanaedan da a balay.
Inpakaammo na a sakbay a dimteng dagiti kameng ti Bureau of Fire Protection ket nagtitinnulong dagiti karruba na a nangsebseb ti apoy.
Kuna ni Domantay a ti kangrunaan a napakarwan ken kasapulan a masukatan ket ti bobeda ti balay.
Innayon na nga awan met dagiti kagamitan da a nauram gapu ta alisto a nasebseban ti apoy iti ayan da a kwarto, ngem ti laeng problema ket saan da a nakaturog a nagpatnag gapu ta namin-uppat a daras a simged ti apoy iti nasao a balay isut gapuna a nagsubli-subli dagiti bombero.
Kabayatanna, inrakurak ti maysa kadagiti agnanaed iti balay a ni Mr. Conrado Duran nga iti kwarto na ti napakarwan gapu ta awan pulos dagiti gamit na a nasalbar a pakairamanan dagiti badbado ken paglutwan na.
Inlawlawag na a ti nangrugyan ti apoy ket iti kwarto ti kabsat na gapu ta possible a nalipatan na a pinatay ti us-usaren na a kandela.
Kuna na a nakariing gapu ta makaisbo ket ditoy metten a nakita na a maur uram ti balay da.
Immapela met ti tulong ni Duran gapu ta awan pulos ti nasalbar na kadagiti kagamitan na pakairamanan dagiti grocery na.
Mainaig iti daytoy, kinumpirmaran ni Duran a gapu iti napasamak ket nagsagaba ti third degree burn ti kabsat na.
