LAOAG CITY – Nauram ti pagtaengan ti maysa a lakay kalpasan a nabaybay-anna ti lutlutuenna idiay Brgy. Nalupta idi ciudad ti Batac
Nabigbig ti agtagikua ti balay a ni Francisco Pecpec, agtawen ti 81, agmaymaysa iti biag ken residente iti met laeng nasao a barangay.
Gapu iti daytoy, nagsagaba ti biktima iti naduduma a sugat ti parte ti bagina kas ti bukotna kalpasan ti insidente.
Segun kenni Mr. Jose Quimoyog, ti Bgry. Kapitan iti nasao a barangay, naipaayan ti ayuda ti lakay babaen ti City Social Welfare and Development Office gapu ta awan pulos naisalbar nga arwatenna.
Inbatadna a tallo a lugan ti BFP ti nagresponde ken nangsebseb iti uram, ken dua kadagitoy ket manipod iti ciudad ti Batac ken maysa idiay ili ti Paoay.
Segun ti imbestigasyon ti BFP, saan a napuotan ti biktima ti uram isut gapu na nga alisto a nagramram ti apoy gapu ta naaramat laeng ti light materials ti balay na ken adu dagiti agkakaiwara a basura.
Karaman pay a nauram dagiti tarakenna a kalding ken pato.
Nupay kasta, saanen nga indetalye ti BFP nu manu ti balor dagiti nadadael a kagamitan ti biktima iti napasamak nga uram.
Iti agdama, makitarus payleng ni Pecpec kadagiti nasinged a kabagyan na.
