LAOAG CITY – Kinumpirmaran ni Police Captain Joseph Tayaban, chief of police ti PNP-Badoc ti pannakarekobre ti maysa a bangkay ti lalaki iti kabakiran a paset iti nasao nga ili.
Binigbig na ti bangkay a ni Bernard Mendoza Jr. y Tulay, agtawen ti 47, awanan ti asawa, awanan ti trabaho ken residente iti Barangay Mabusag Norte iti nasao nga ili.
Inlawlawag na nga iti panagbirbirok dagiti kakabagyan ti biktima ket adda ti nabangsit nga angot ti maysa kadagitoy ken ditoy a nakita da ti bangkay.
Inbatad na a basar iti resulta ti eksaminasyon ken imbestigasyon ket awan ti senyales nga adda ti foul play ti pasamak ken kumbinsido met ti pamilya ti narekobre a bangkay.
Kunana a basar iti kabsat ti biktima ket managinom ti arak ken adda ti sakit na a kissiw, ken iti pannakaospital na ket inbaga ti doktor a saan a maagasan ti sakit na gapo ta agin-inom ken masapol a mangan laeng daytoy.
Segun kenni Tayaban, makikabkabbalay laeng ti biktima iti kabagyan na.
Maipalagip nga idi Domingo ket nagpakada a mapan iti maysa a kabagyan na ngem awan iti nasao a lugar agingga a nagpukaw ken nabirukan a maysan a bangkay.
