LAOAG CITY – Natay ti maysa a baro kalpasan a nadesgrasya iti national highway a paset ti Brgy. Calluza iti ili ti Piddig.
Segun ken ni PNP-Piddig Chief PLt. Rudy James Jacalnes, ti biktima ket agtawen ti 19, mannalon, awanan ti asawa ken residente iti nasao a barangay.
Inbatad na a basar iti inisyal nga imbestigasyon, naggapo iti birthday party iti Brgy. Sta. Maria ti biktima a naglugan iti motorsiklo nga agmaris ti nangisit a Motorstar StarX 125 ken awanan ti plate number.
Inpakaammo na a bayat nga agpapalaud ti biktima ken nakadanon iti kurbaan a paset ti kalsada a sakop ti Brgy. Calluza ket dita a na-overshoot na daytoy ken naidungpar iti plant box nga adda iti igid ti kalsada.
Inbatad na a nagderetso pay daytoy a naidungpar iti kayo ti gmelina.
Gapu iti daytoy, nagsagaba ti nakana a sugat iti ulo ti biktima ken dagus a naitary iti Piddig District Hospital ngem naideklara a dead on arrival.
Naamoan nga adda iti impluwensya ti nasanger ti biktima idi napasamak ti insidente ken awan iti aniaman a protective gear a suot daytoy.
Agtultuloy ti imbestigasyon dagiti otoridad kalpasan ti insidente.
