LAOAG CITY – Agtultuloy ti imbestigasyon ti Philippine National Police mainaig iti pannakatay ti maysa a baro kalpasan a maipagarop a pinaltugan na ti ulo na iti Barangay Tabucbuc iti ili ti Marcos.
Daytoy ti inbatad ni Police Capt. Jonevalle Maramag, ti chief of police iti ili ti Marcos.
Inlawlawag ni Maramag a basar iti imbestigasyon da, nagbirthday ti maysa a kasinsin ti biktima isut gapuna a napan nakiinom no sadinno nga uppat da a nagsasango a naginom.
Segun ken ni Maramag, kabayatan ti panaginom ti biktima ken dagiti tallo a kakadwa na ket maipagarop nga inpakita ti maysa ti paltog na.
Kuna ti hepe ti pulisya a naamoan da nga innala ti biktima ti nasao a paltog kalpasan na ket inay-ayam na.
Innayon na a kalpasan laeng ti sumagmamano a gundaway ket dinawat ti biktima ti magazine ti paltog no sadinno nga apaman a naiggaman na ket insalpak na a dagus ken intutuk na iti ulo na kagiddan ti panangpaputok na.
Inpakaammo ni Maramag nga iti agdama ket naiget ti panangiyus-uswat da ti naun-uneg nga imbestigasyon tapno maamoan no ania ti pudno a napasamak.
Naamoan ti news team ti Bombo Radyo Laoag a ti biktima ket nabiit pay a nagturpos iti kolehiyo manipod iti maysa a pribado a pagadalan ditoy ciudad ti Laoag.
