LAOAG CITY – Balligi ti naiyuswat a drug buy bust operation iti a nakatiliwan ti maysa a bus driver ditoy ciudad ti Laoag.
Nabigbig daytoy a ni Elson Steve Martin, agtawen ti 52, maysa a driver iti Fariñas Trans nga addaan ti ruta a Laoag-Baguio, tubo iti probinsya ti Abra ken agdama nga agnanaed iti motorpool ti nasao a kompanya ditoy ciudad.
Segun kenni Police Lt. Col. Rafael Lero, chief of police ti PNP-Laoag, nakumpiskar da iti nasao nga operasyon ti innem a sachet ti naglaon ti maipagarop a shabu nga agdagsen ti 7.2 a gramo ken agablor ti 72 a ribo a pisos, wallet, cellphone, ken tricycle.
Inbatad na a ti maipagarop a droga a nakumpiskar dagiti otoridad ket naipan iti envelope ken daytoy ket kapik-pick up laeng manipud Metro Manila.
Kunana a ti nakasurat iti envelope ket medical result manipud iti ngem ti karga na daytoy ket maipagarop a droga.
Inlawlawag na a basar iti rekord da ket adda iti Provincial Priority Target ken maysa kadagiti miembro iti drug group.
Nakalibas met ni Manuel Remigio a.k.a Manning, dati met laeng a driver iti nasao a kompanya, residente iti ili ti Banna, ken naitaray ni Remgio ti tallo ribo a pisos a nausar iti transaksyon.
Kabayatanna, manarimaan met ti pursuit operation dagititi otoridad tapno matiliw ni Remigio.
