LAOAG CITY – Nagballigi dagiti otoridad a nangtiliw iti maysa a lalaki iti naisayangkat nga anti-illegal drug buy-bust operation iti Barangay 7-A ditoy ciudad ti Laoag.
Nabigbig ti suspek nga alyas Fonta, agtawen ti 45, naasawaan, construction worker ken residente metlaeng iti nadakamat a barangay.
Inarestar a dagus dagiti otoridad ti suspek kalpasan a naglako ti maysa a sachet a naglaon ti maipagarop a shabu iti nagpammarang a poseur-buyer.
Nakumpiskar pay iti ikot ti suspek ti tallo a sachet a naglaon metlaeng ti maatap a shabu, maysa nga open transparent plastic sachet, P 6,000.00 a nausar kas buy-bust money pakairamanan ditoy ti maysa a genuine P1,000.00 bill ken lima a peke a P1,000.00 bill
Mapatta-patta nga agdagsen dagiti nakumpiskar a maipagarop a shabu iti suspek iti sumuruk-kumurang 1.5 grams.
Iti agdama, nagtalinaed ti suspek iti Philippine National Police ditoy ciudad ti Laoag ken maisagsaganan ti kaso a panaglabsing ti Republic Act 9165 wenno Comprehensive Dangerous Drugs Act of 2002 a maipila kontra kenkuana.
