LAOAG CITY – Kinumpirmaran ti Department of Migrant Workers (DMW) a natay ti maysa a Filipino seafarer kalpasan ti panagbettak ti oil tanker nga MT Velos Sapphire iti Persian Gulf idi Huebes, Nobiembre 5.
Iti laksid ti insidente, natalged ken nasayaat ti kasasaad dagiti 21 pay a Filipino crew members nga adda iti nadakamat a barko.
Impasigurado ti DMW a sisasagana ti sibubukel a gobierno a mangipaay iti dagus a tulong ken pinansial a tulong iti pamilia ti pimmusay a marino, pakairamanan ti panangasikaso iti pannakaisubli dagiti bangkayna ken ti kasapulan a counselling para kadagiti nakalasat a kailian.
Iti agdama, agtultuloy ti imbestigasion dagiti autoridad no ania ti makagapu iti panagbettak, a ti kangrunaan nga imbestigasion ket ti posibilidad a naggapu dayta iti panangraut ti drone.
