LAOAG CITY – Natalged a nakaawid iti Pilipinas dagiti 46 nga overseas Filipino workers (OFWs) manipud iti Kuwait ken 17 a Pilipino a seafarers manipud iti barko a M/V Minoan Dignity, basar iti Overseas Workers Welfare Administration (OWWA) idi kalman, Agosto 22.
Simmangpet ti 46 nga nga overseas Filipino workers (OFWs) iti Ninoy Aquino International Airport 1 babaen ti Kuwait Airways kabayatan a simmangpet met dagiti 17 seafarers iti Terminal 3 babaen ti Emirates.
Ti M/V Minoan Dignity ket tinamaan ti saan pay a masinunuo a projectile kabayatan a dumaldalyasat daytoy iti abagatan ti Strait of Hormuz. idi Agosto 18.
Naamoan nga adda 18 a Filipino crew iti barko ngem pimmusay ti maysa a Filipino chief engineer. Idinto a ti 17 a nasalaknib ket naikabil iti Khasab, Oman sakbay ti pannakasayangkat ti repatriation-da iti pagilian.
Kabayatanna, iti panagsangpetda iti pagilian, naipaayanda ti airport assistance ken dadduma pay a kasapulan a suporta manipud iti Overseas Workers Welfare Administration (OWWA) ken Department of Migrant Workers (DMW), kabinnulig ti Manila International Airport Authority Medical team ken ti manning agency-da.
Nangipaay pay ti Overseas Workers Welfare Administration (OWWA) ti financial assistance, taraon, temporario a pagtaengan ken plete a mapan kadagiti bukod a probinsia dagiti 46 nga overseas Filipino Worker (OFW).
Basar ti Overseas Workers Welfare Administration (OWWA) nga agtultuloy ti panangsuportarda kadagiti nagawid a mangmangged iti komunidadda pakairamanan ti welfare, financial, livelihood, employment, counseling ken dadduma pay a reintegration assistance a depende iti kasapulanda.
