LAOAG CITY – Desidido ni Mr. Victor Villanueva, maysa a senior citizen ken tricycle driver iti Barangay 4 iti ili ti Bacarra a mangipila ti reklamo kontra kenni Barangay Chairman Angelo Sales.
Daytoy ket gapo iti maipagarop a panangdanog kenkuana ti kapitan iti laksid nga awan met ti ammo na a madi nga inaramid na.
Ummuna iti daytoy, kuna ni Villanueva a napana isuna nakaiminatay iti Barangay 1 iti nasao met laeng nga ili ken ditoy a nakita nga indibidwal a saan a nakasuot ti face mask isut gapo na a sinitana daytoy.
Nupay kasta, inbatad ti lakay a nakagura ti nasao nga indibidwal ken rimwar ngem nagsubli ken inpakita na kenkuana ti facemask na.
Inlawlawag na a simmaruno met ni Kapitan Sales ken inbaga na kenkuana a riribok iti minatayan ken kellaat lattan a dinanog na ti lakay rason a natulid daytoy.
Gapo iti daytoy, dagus a pimmanaw ti lakay iti minatayan ken nagturong iti istasyon ti pulisya tapno mai-blotter ti napasamak kenkuana, ken napan nagpamedical.
Patien ni Villanueva a nagipulong ti indibidwal a sinita na iti kapitan rason a napasamak daytoy ken nasken kuma a nakisarita a nasayaat ti opisyal ken saan nga agdangran.
Kabayatanna, nagkedked met a mangipaay ti komento ni Kapitan Sales mainaig iti daytoy.
