LAOAG CITY -Inbatad ti Malakanyang a nagkedked ti Czech Republic a nangipaay ti ad-ado pay a detalye mainaig iti pannakatiliw ni dati nga Ako Bicol Partylist Representative Zaldy Co iti nadakamat a pagilian.
Immuna iti daytoy, nakitaripnong ni President Ferdinand ”Bongbong” Marcos Jr. kada French Ambassador Marie Fontanel ken Eva Tenzin, Chargé d’Affaires of the Embassy of the Czech Republic tapno pagsasaritaan da ti maipanggep iti kaso ni Co.
Segun ken ni Communications Undersecretary Claire Castro, kabayatan ti taripnong ket kinumpirmaran ni Tenzin ken ni Presidente Marcos a naibalud ni Co iti Czech Republic gapu iti invalid travel documents.
Nupay kasta, inlawlawag ni Castro nga iti panagkiddaw ti president ti nayun nga impormasyon ket nagkedked da Tenzin ken Fontanel gapu ta adda ti sursuruten ti Czech Republic nga international law, European, ken national laws.
Iti baet daytoy, inpakaammo ni Castro nga inkari ti France ken Czech Republic a makikooperar da iti gobierno ti Pilipinas kas maiyataday iti linteg.
Iti agdama, ni Co ket adda idiay France, a nagkiddawan na ti asylum.
Ni Co ket sumangsango ti kaso gapu iti maipagarop a pannakainaig na kadagiti maanomalya a flood control projects ditoy pagilian.
