LAOAG CITY – Natay ti maysa a lalaki kalpasan a natinnag iti kayo ti gmelina wenno paper tree iti Sitio Lingay, Barangay Tamdagan iti ili ti Vintar.
Ti biktima ket maysa a lalaki nga agtawen 58 ti 44, awanan asawa ken mannalon a residente iti Barangay Alsem iti ili ti Vintar.
Segun iti report ti Philippine National Police (PNP) Vintar, napan nagpukan ti kayo ti biktima a kadwana ni Mr. Prisco Pacis Urosola, agtawen 69, naasawaan, mannalon, ken residente met laeng ti Barangay Alsem iti ili ti Vintar idinto a nabaon nga agpukan iti sanga ti kayo nga addaan kangato a 30 a metro.
Apaman a nagpukan ti biktima, nakangngeg ni Mr. Urosola ti matintinnag manipud iti kayo.
Idi kumita daytoy ti baba ti kayo, nakitana ti biktima a nakaidda ken daradara kangrunaan ti akin kannawan nga abagana ken ti rupana.
Nupay kasta, insidiga met a naitaray ti biktima iti Vintar District Hospital ngem naideklarar daytoy a dead-on arrival babaen ti attending physician a ni Dr. Nathalie Fate My. Tunac gapu iti traumatic brain injury secondary to accidental fall.
Mainaig iti daytoy, mapapati a ginandat ti biktima a kugtaran ti naputol na a sanga ti kayo no sadinno a naisurot daytoy a natinnag.
Kabayatanna, awan met ti foul play ti napasamak nga insidente.
