LAOAG CITY – Napaltogan ti akin-kannawan a luppo ti maysa a lalaki iti Barangay 1 iti ili ti Bacarra.
Nabigbig daytoy a ni Mr. Froilan Madariaga, agtawen ti 40, awanan ti asawa, maysa a pintor ken residente iti nadakamat a barangay.
Segun kenni Police Major Dionisio Baldillo, idi rabii ket nakaawat da ti tawag manipud iti Gov. Roque Ablan Senior Memorial Hospital ditoy ciudad ti Laoag nga adda ti pasyente a napaltogan.
Dagus met a nagturong dagiti kameng ti PNP iti pagtaengan ti biktima ken iti inisyal nga impormasyon, pinaltogan ni Madriaga ti bukod na a bagi ngem awan ti narekobre da a paltog.
Inbatad na a ti laengen nakakitaan da ti dara ket ti mismo kwarto ti biktima.
Mainaig iti daytoy, kunana a posible a ti luppo ti biktima ti napaltogan ken simmarot ti slug iti babaen ti tumeng na.
Dinakamat na maiyuswat ti ballistic examination iti naala nga slug manipud iti biktima.
Kunana nga idi rabii ket nagkedked ti biktima a mangipaay ti komento seknan iti daytoy ngem ikarigatan da nga alaan daytoy para iti imbestigasyon.
Innayon na nga agtultuloy ti naun-uneg nga imbestigasyon seknan iti daytoy nangruna ket maipagarop a saan nga agsusurot ti palawag dagiti kapamilya ti biktima.
