LAOAG CITY – Natay ti maysa a lalaki kalpasan ti panagdinnungpar dagiti dua a motorsiklo iti paset ti Barangay 16, San Marcos iti ili ti San Nicolas.
Nabigbig daytoy a ni Alex Corpuz ken residente iti Barangay 13, Baay idiay ciudad ti Batac idinto a ti kinadinnungpar na ket ni John Weshley Deuz y Caraang, agtawen ti 25 ken residente iti Barangay 18, San Pedro iti nasao nga ili.
Segun kenni Police Staff Master Sergeant Maynard Valerio, imbestigador ti PNP-San Nicolas, adda iti right shoulder ti kalsada ken agkurba nga agturong iti cockpit arena ni Corpuz idi nakadinnungpar na ni Deuz nga aggapo iti abagatan a direksyon.
Gapo iti daytoy, naipurwak ti motorsiklo nga inturong ni Corpuz ken naitaray iti Black Nazarene Hospital ngem naideklara a dead on arrival gapo iti sinagaba na a sugat iti nagduduma a paset ti bagi na.
Inbatad ni Valerio a 100 a kilometro iti kada oras ti kapaspas ti tartarayen ni Deuz nga adda iti impluwensya ti nasanger.
Innayon ni Valerio a ni Deuz ket nadait ti akin-kannigid a tumeng na ken gasgas iti nagduduma a paset ti bagi na ken nagtalinaed daytoy iti Provincial Hospital.
