LAOAG CITY – Natay ti maysa a lalaki a nangiturong ti kurung-kurong kalpasan a nakadinnungpar na ti Isuzu elf truck iti Josefa Llanes Escoda National Highway bisinidad ti Barangay Juan iti ili ti Solsona.
Binigbig ni Police Capt. Randy Damo, ti chief of police iti ili ti Solsona ti biktima a ni Joel Asuncion, agtawen ti 39, awanan ti asawa, ken residente iti Barangay Man-anteng iti ili ti Solsona idinto a ti nangiturong ti Isuzu Elf truck ket inturong ni Warren Ramos, agtawen ti 30, naasawaan ken residente iti Barangay Maan-anteng iti ili ti Solsona.
Inbatad na nga iti imbestigasyon da, agpadpadaya ti biktima idi ginandat na ti ag-overtake iti sarsarunwen na a behikulo no sadinno a saanna a naripar ti sumungad nga agpalaud nga Isuzu Elf truck a nagresulta ti panagdinnungpar da.
Kuna na pay a ginandat ni Ramos a liklikan ti biktima a nangitunda met iti pannakaidungpar na iti poon ti kayo nga adda iti igid ti kalsada.
Inpakaammo ni Damo nga agpada a naitaray da Asuncion ken Ramos iti Dingras District Hospital iti ili ti Dingras ngem naideklarar a pimmusayen ti nasao a biktima.
Nakaruwar metlaeng a dagus ni Ramos iti ospital kalpasan a naeksamen ngem naideretso daytoyen iti kwerpo ti pulisya kabayatan a maiyur-uray ti desisyon ti pamilya ti biktima.
