LAOAG CITY – Natay ti maysa a lalaki kalpasan a nalmes iti karayan a sakopen ti Brgy. Guerrero iti ili ti Dingras.
Segun kenni Police Lt. Joel Corales, deputy chief of police iti PNP Dingras, agarup alas-singko idi malem kalman a nakaawat da ti report manipud iti barangay chairman iti nasao a barangay.
Binigbig ni Corales ti biktima a ni Mark Anthony Ceredon, agtawen ti 42, balo, ken residente iti Brgy. Madamba iti nasao nga ili.
Kuna na a nakita dagiti tallo nga empleyado ti maysa a construction firm nga agsakdo kuma iti danum nga agtatapaw ti biktima rason nga inpakaammo da nga insegida iti kapitan.
Inbatad ni Corales a naudi a nakita dagiti karruba ti biktima ket agarup alas-dose y media iti aldaw ken maipagarup nga adda iti impluwensya ti nasanger.
Kuna ni Corales a basar iti pamilya ti biktima ket arig nga inaldaw a nakainom ti biktima.
Innayon na nga iti dayta a kanito laeng a napan ti biktima iti karayan.
Indeklara ti doktor iti municipal health unit a nalmes ti biktima.
