LAOAG CITY – Natiliw ti maysa a lalaki kalpasan ti panagtakaw da ti waya iti maysa a construction supply iti Brgy. 1 iti ili a San Nicolas.
Nabigbig daytoy a ni Efren Tagle y Alegado, 39, naasawaan ken residente iti Brgy Claro, Recto, Angeles City, Pampanga.
Basar iti imbestigasyon, nakaawat ti report ti sekretaryo ti nasao a construction supply manipod ti maysa a customer da a ni Tagle ket nagala ti maysa a rolyo ti flat cord no. 16 nga agbalor ti P2,325 ken maysa a rolyo ti flat cord no 18 nga abalor ti P1,455 nga inlugan na iti maysa a Toyota Hi-Ace Van nga addaan ti conduction sticker # a YU 6538.
Gapu iti daytoy, tiniliw ti security guard ni Tagle idinto a nakalibas ti saanen a nabigbig a nagmaneho ti van a nagturong iti abagatan a direksyon.
Nabigbig ti agtagikua ti nasao a van a ni Cresencio M. Dizon a taga Sapang Biabas, Mabalacat, Pampanga.
Iti agdama, agtultuloy ti imbestigasyon mainaig iti insidente.
