LAOAG CITY – Balligi ti naiyuswat a drug buy bust operation dagiti otoridad a nakatiliwan ti maysa a lalaki iti Barangay Baay idiay ciudad ti Batac.
Nabigbig daytoy a ni Jonel Felix y Pungtilan, agtawen ti 35, drug surenderee ken residente iti nasao a barangay.
Nakumpiskar kenni Felix ti maysa a sachet a maipagarop a naglaon ti shabu, uppat nga elongated sachet a maatap a naglaon met laeng ti shabu, maysa a cellphone, kwarta ken ti nausar a buy bust money a 500 a pisos.
Mainaig iti daytoy, naiget a naglikudan ni Felix nga aglaklako ti droga ken maluksaw gapo iti wagas a pannakatiliw gapo ta maipagarop a natutukan ti paltog, naposasan ken nakaut ti bulsa na.
Segun kenni Felix, naggapo isuna iti balay da ken mapan laeng kuma gumatang ti mainom a nasanger idi adda ti dua a nanggammat kenkuana.
Kunana a saan na nga ammo ti rason no apay a naiyuswatan ti operasyon idinto a kanayun nga adda iti taltalon, ken no aramid na ti aglako ti droga ket saan na kuma a maanusan ti trabaho ti maysa a mannalon.
Inadmitir nga iti kallabes ket nagusar ti droga ngem simmuko met laeng ken inpetteng na a saanen nga agar-aramat.
Kabayatanna, Inpetteng ni Police Major Allan Emerson Dauz, ti chief of police ti PNP-Batac a nagsubli iti iligal nga aktibidad ni Felix.
Segun kenni Dauz, dua a lawas da a minonitor ni Felix agingga a naiyuswat ti drug buy bust operation kontra iti daytoy.
Inlawlawag pay ni Dauz a no saan a natiliw ni Felix ket posible nga isuna ti agisungsung kadagiti simmuko wenno residente iti nasao a barangay.
Inbatad na manen a dagiti amin a matiltiliw iti operasyon ket ibaga da a planted dagiti maala nga ebidensya kontra kadakuada.
Kunana nga iti laengen korte ti pagpalawagan na ken ditoy na a paneknekan a naimula dagiti maipagarop a droga a nakumpiskar kenkuana.
Naamoan a ni Felix ket adda iti street level target ti PNP-Batac.
Nagballaag ti hepe iti publiko kangrunaan na dagiti adda ti pakainaigan na iti iligal a droga nga agsardeng na ken itultuloy da ti agbalbaliw tapno saan da a maoperasyonan.
