LAOAG CITY – Plano ni Mr. Expedito Dela Cruz, Brgy. 60-B, Madiladig ditoy siudad ti Laoag a mapatalaw dagiti residente a nangipatakder ti pagtaenganda a sakupen iti solar ti dagada.
Segun kenkuana, saan pay unay a nabayag idi naduktalanda a kukuada ti nasao a daga kalpasan nga adda ti kabagianda a napan idiay Mindanao ti nangipatulod kadagiti titulo a mangipaneknek a kukuada ti daga.
Gapu iti daytoy, kunana a dagusna a kinasarita ti pamilia Ramos ken Caridad nga isuda ti agdama nga agnanaed iti daga a nakaipatakderan dagiti pagtaenganda.
Inpalgakna a namin-adun a daras a napagsasaritaanda daytoy a banag iti barangay ngem saan nga agat-atendar dagiti maseknan a pamilia.
Nupay kasta, naiget nga ipetpetteng dagiti dua a pamilia a kukuada ti daga gapu ta adda ti iggemda a kasuratan a naisalda ti daga kadakuada banag nga awan met ti maipakitada kenkuana nga aniaman a dokumento.
Inlawlawagna a mabalin met nga agtalinaed dagiti maseknan a pamilia no laketdi kabaelanda a mabayadan ti presio iti panangilakoda iti daga.
Mainaig iti daytoy, maibasar iti impormasion nga indanon ti City Assessor’s Office kenkuana idi kangrunaanna ken ni Mr. Ruben Domingo ket nagbalin a public lot ti dagada kalpasan iti naunday a panawen a saanda a nakabayad ti amiliar iti daytoy.
Inbatadna a kuna ti nasao a pangopisinaan a maisubli laeng ti dagada kadakuada no agbayadda ti amiliar iti sangapulo a tawen.
Innayonna nga adda ti kalawana ti dagada iti 3,699 square meters pakairamanan pay ti talonda nga adda ti kalawana a 200 square meters.
Kabayatanna, naammoan nga iti agdama ket manarimaan manen ti panag-annex dagiti dua a pamilia kadagiti pagtaenganda iti dagada.
