LAOAG CITY – Nagbaliktad ti Mitsubishi L300 iti Brgy. Tabug iti suidad ti Batac.
Segun kadagiti otoridad ti driver ket ni Efren Talub Cariafa, agtawen ti 57, awanan asawa, Brgy. Chairman ken residente Brgy. 5-B Pagsanahan Norte iti ili ti Badoc idinto a dagiti pasaheros na ket isuda Ronalyne Balbas, agtawen ti 33, naasawaan, Josephine Aurelio, agtawen ti 53, naasawaan, Leonora Miran Butay, agtawen ti 49, naasawaan, John Ronel Cariaga Espiridon, agtawen ti 15, Elma Pasion Tabangin, agtawen ti 49, awanan asawa, Filma Mangabat Cariaga, agtawen ti 50, naasawaan, Hosifina Hosete Cariaga, agtawen ti 62, Sharon Burelio Cariaga, agtawen ti 29 ken agpapada a residente iti Brgy. 5-B Pagsanahan Norte iti ili ti badoc
Segun iti imbestigasion ti Philippine National Police iti suidad ti Batac, dumaldalyasat iti agpaamianan a direksion ti lugan ket kellaat a bimtak ti akin-kannawan a sango a ligay rason a napukawan daytoy ti kontrol ken nagbaliktad iti nasao a lugan.
Gapu iti daytoy, nagsagaba iti sugat iti nagduduma a paset iti bagina ti driver pakairaman dagiti pasaheros na, idinto a ti agtutubo a biktima ket natukkol ti imana ken dagos met a naitaray dagitoy iti Mariano Marcos Memorial Hospital and Medical Center iti siudad ti Batac para iti naan-anay a pannakatamingda.
Inayon dagiti otoridad a saan a nakainom ti driver idi napasamak ti desgrasya.
