LAOAG CITY – Impakaammo ni PMaj. Chris Anthony Sorsano iti Philippine National Police iti ili ti Banna a nairidep ti driver ti Toyota Rush bayat ti panagbiyahe na nga agawid iti Barangay Lydia iti ili ti Marcos.
Daytoy ket kalpasan a nagbaliktad ti nasao a lugan iti Barangay Valenciano iti ili ti Banna.
Segun ken ni Sorsano, apaman a nakaawat da ti report nga adda nadesgrasya, ket insigida da a nagresponde.
Kunana a basar iti palawag kadakuada ti driver ket nairidep na bayat nga agmanmaneho rason a naidungpar na iti concrete barrier ken bimmaliktad ti lugan nga inmanmaneho na.
Naammuan a ti driver ket aggapo iti ili ti Nueva Era ken paawid isunan idi napasamak ti insidente.
No pay saan a nagsagaba ti nakaru nga injury ti driver ket naitaray latta iti Rural Health Unit para iti naan-anay a pannakataming na.
Imbatad met ti Rural Health Unit nga awan ti impluwensya ti driver ti nasanger.
Iti agdama ket nakaawiden ti driver ken addan iti natalged a kasasaad.
Kabayatanna, nagballaag ni Sorsano iti publiko a saan laeng a dagiti lugan nga usaren ti kitaen no agbiyahe, iraman pay a kitaen ti bagbagi no nakakondisyon nga agmaneho tapno maliklikan ti aniaman a desgrasya.
