LAOAG CITY – Natiliw ti maysa a menor de edad a taga Barangay Navotas ditoy ciudad ti Laoag iti naisayangkat a drug buy-bust operation iti nagbedngan ti Barangay 5 ken Barangay 6 ditoy ciudad ti Laoag.
Naamoan a naglako ti agtawen ti 16 a suspek ti maysa a sachet a naglaon ti napagango a bulong ti marijuana iti maysa a pulis a nagserbi a poseur-buyer.
Malaksid ti daytoy, adda pay ti maysa a sachet a naglaon met laeng ti marijuana iti ikot ti suspek.
Nupay kasta, inpetteng ti suspek awan ti ammo na kadagiti naala kenkuana nga ebidensya ken saan nga aglaklako iti illegal a droga.
Kabayatanna, inbatad ni Police Major Adriano Licudan, ti deputy chief of police ditoy ciudad ti Laoag nga adda ti posibilidad na nga adda dagiti laklakoan ti suspek a pada na nga estudyante gapu ta awan ti pilpilyen a lakoan ti pusher.
Naamoan a ti suspek ket adda iti drug watchlist ken nabayagen a monmonitoren dagiti otoridad.
