LAOAG CITY – Inbatad ni Barangay Chairman Glen Ford Paguirigan iti Barangay Sta. Maria ditoy ciudad ti Laoag nga adda ti nakakurung-kurong a nanggandat a mapan agibelleng ti basura na iti barangay da.
Segun ken ni Paguirigan, mismo a ni Barangay Chairman Rojien Tamayo iti Barangay 15 ditoy ciudad ti nakakita iti nakakurung-kurong kabayatan ti papanna iti talon na rason nga inpakaammo na a dagus daytoy kadakuada.
Kuna ni Paguirigan a dagiti mapan koma ibasura ti nakakurung-kurong ket dagiti nabasa a karton, plastic ken dadduma pay.
Nupay kasta, inlawlawag na a timmawag ti agtagikua ti kurong-kurong a nakailuganan dagiti basura a binulod ti pagayam na daytoy ken isuna ti nangibaon iti driver na mapan koma mangibelleng iti barangay da.
Iti met biang ti pagayam ti akinkukua ti kurung-kurong, saan nga iti barangay Sta. Maria ti inbaga na a pangibellengan ti driver na kadagiti basura.
Inpakaammo ni Kapitan Paguirigan a pinaayaban da iti nakakurung-kurong iti barangay da tapno koma pagsaludsudan da ngem saan pulos a nagsarita isut gapuna a inikkan da ti citation ticket.
