LAOAG CITY – Maluksaw ni Maria Cristina Acoba, residente iti Brgy. 6 iti ili ti Bacarra ken aglaklako ti liquefied petroleum gas gapo iti peke a sangaribo a pisos a pinagbayad ti customer da
Segun kenni Acoba, patien na a napasamak daytoy idi bigat kalman no sadinno ti asawa na ti nakabantay iti pwesto da.
Inlawlawag na nga idi ur-urnusen na dagiti kwarta na para iti pagbayad iti ipasakada na a lako da ken ditoy nan a naripar ti sabali ti maysa a pidaso ti sangaribo a pisos.
Dagus na met a napan inpakita iti asawa na nga isu ti nagbantay ngem saanen a malagip ti maseknan no kasano ken siasinno ti nangibayad kadakuada daytoy.
Kuna ni Mrs. Acoba a mabalin a saanen a naripar ti asawa na idi naibayad kenkuana ti sangaribo a pisos nangruna ket saan unay a makalasin ti akin-kannigid a mata na.
Mainaig iti daytoy, inbatad na a karigat ti biag kadagitoy a gundaway ngem adda pay laeng dagiti kastoy ti aramid da.
Nupay kasta, kunana nga ipa-Diyos da laengen ti napasamak ken mangnamnama a saanen a maulit daytoy.
Kabayatanna, naamoan a daytoyen ti maikadua a gundaway a nakaawat da ti maipagarop a peke a sangaribo a pisos no sadinno ti damo ket idi Disyembre iti napalabas a tawen.
