LAOAG CITY – Kinumpirmaran ni Police Captain Christian Felix, ti chief of police ti PNP-Pasuquin a ti suspek a naglibas kalpasan a nakadungpar ti menor de edad iti Barangay Davila ket isu ti maysa kadagiti karaman iti desgrasya iti Barangay 3 iti nasao nga ili.
Segun kenni Felix, ti driver ti kotse a nakadungpar iti agtawen ti 10 nga ubing ket agtawen ti 39, maysa a negosyante ken residente iti Barangay 1 ditoy ciudad ti Laoag.
Kunana a basar iti panagimbestigar da ket agpaabagatan a direksyon ti kotse idi nadungpar na ti ubing ngem intarayan na daytoy ken nagna iti Barangay 3.
Nupay kasta, inbatad ni Felix nga iti panaglibas ti driver ti kotse ken rumwar iti provinvial road a paset ti nasao a barangay ngem nadungpar na ti likod ti maysa a pick-up nga inturong ti maysa met laeng a negosyante a residente iti ili ti Badoc.
Rumrumwar a saan a kabisado ti driver ti kotse ti dalan iti Barangay 3.
Inlawlawag pay ni Felix a mabalin a gapo iti panagnerbyos ti driver ti kotse iti panaglibas na ken napaspas ti panagpataray na gapo ta kayat na ti makaadayo ket napasamak ti desgrasya.
Kabayatanna, ti biktima a menor de edad ket nagtalinaed iti Gov. Roque Ablan Senior Memorial Hospital kalpasan a na-fracture ti akinnawan a saka na.
